كنت مجرد وقت … كنت أنا البديل .
للكاتبه / هاميس جمال
أنا على حافة الإنهيار ، أو يمكن فعلا مُنهارة و مش قادرة أواجه الحياة لوحدى .
أنا إتآذيت من أكتر شخص حبيته و إختارته بعقلى و قلبى ، أنا ضحيت كتير علشان علاقتنا تكمل ….
و لكـــــــــن فجأة قفل بابه فى وشى و قالى ( كل شىء نصيب ) !!!!
و كأن نور الحياة كله إنطفئ ف عينى و مش شايفة قدامى !
و لما سألتها إيه السبب كانت الإجابة حقيقى مؤلمة جداً…
مسحت دموعها و إتنهدت وقالت ….
إنه قالها بمحاولاته الكتير أنه يحبها و لكن مقدرش و إنها كانت مجرد مُسكن لعلاقة قديمة هو كان محتاج ينساها …
يااااااه هو أد كدة مشاعرنا لعبه ف أيد الغير ..
و إننا مجرد وقت أو حتى صفحة ف كتاب و مصيرها للقطع
صدمة بكل المقاييس طبعاً و مشاعر صعب جداً تتحكى أو تتخطى .
إحنا هنا مش قدام حاله فراق عاديه و لكن قدام إنسانه قررت إنها تأذى نفسها بنفسها و تدخل ف دوامة متنتهيش من الخداع النفسي و العقلى كمان …
تعالوا نعرف هل هى ظالمة و لا مظلومة ف حكايتها ؟؟
و إيه السبب اللى يجبرنى أدخل ف علاقة منتهيه من قبل حتى ما تبدأ .
عزيزتي كل أنثى بتقراء كلامى و حاسة بحروفى تعالى نتكلم من القلب و ندخل جوة الغرفة المظلمة اللى قفلاها و كاتبه عليها ممنوع الدخول ، حتى لنفسك .
تعالى نكشف أسرار جوه قلبك محدش شايفها …
سؤالى الأول هل انتى متأكدة من محبته ليكى … ؟؟
طالما وقفتى لثوانى تفكرى إذا الناتج هيكون ( صفر ) … يعنى مفيش حب !!
طيب و اللى كان بينا دة أسمة إيه ؟؟؟
أصارحك و أقولك أنه ( مجرد تعلق ) و للأسف تعلق مرضى طالما قلبك موجوع و مستنزف بالطريقة دى …
يمكن تتصدمى لو قلتلك إنك أصلا مكنتيش بتحبى الشخص دة و لكن أنتى كنتى بتحبى نفسك من خلاله !! طب ازاى ؟؟ تعالى معايا نعرف و هنفتح سوا زى ما إتفقنا الغرفة المظلمة .
يمكن هصدمك لو قلتلك إنك
حبيتى إهتمامة و سؤاله عليكى ..
هرمون الدوبامين بيعلى عندك من أقل كلمة حلوة هو بيقولها حتى لو كنتى متأكدة إنها مجامله و مش حقيقية .
بتحبى قربه ، لمجرد إنك خايفة من شبح الوحدة ( لأن وجود كان بيملأ الفراغ اللى جواكى ) .
بتحبى إحساس المسؤوليه و إنتى بتساعديه وبتحلى مشاكله مكانه .
و طاقة العطاء اللى جواكى الموجهه ليه هو و بس ..
و ممكن كمان تكونى اتعرضتى ف طفولتك لأى مشاعر للرفض و دة سبب ليكى خوف رهيب إنك تتسابى فى يوم من الأيام
و هنا بدأت الكارثة و بدأت رحله الألم جواكى .
طيب ممكن أسألك سؤال تانى ؟
بتحبى نفسك ؟
لو بتحبى نفسك بجد ف نصيحتى ليكى إنك تحافظى عليها من أى آذى .
و الحفاظ دة مستحيل يتم من غير مواجهه حقيقيه و فتح للباب المقفول و نشوف وراه ايه مخليكى متمسكة بالعلاقة المؤذيه دى !!!
خدى نفس عميق و يلا بينا نقف قدام مرايا روحك و شوفى أد أيه انتى مميزة و جميله …
أد ايه تستحقى حب يكون مصدرة الأساسي العطاء المتبادل بينكم …
مش طرف بياخد ،، و طرف معطاء بزيادة .
قومى و أقفى قدام مرايتك و أتأملى جمال ملامح روحك قبل شكلك .
قومى و أفرشى أرض قلبك بالورد لأنك تستحقى تعيشى نسيم الحياة ..
و يوم ما تحبى … لازم تقررى تحبى نفسك الأول …
عارفة ليه ؟؟
علشان لما تحب نفسك هتقدريها و هترفضى تماماً أى إستنزاف ليها .
لما تحبى نفسك هتعرفى إن الحب المشترك هو قمة السعادة الحقيقة .
لما تحبى نفسك هتتأكدى إنك جوهرة ف قلب شريكك مش زى لعبه اليويو يبعدك و يقربك وقت ما هو عايز و وقت ما يحتاج .
لما تحبى نفسك عمرك ما هتكونى ريشه فى مهب الريح لأى ذكر على وجه الأرض .
و بما انى مقدرة كل أوجاعك و آلامك هندخل سوا جوة نفسك و لكن المرة دى و انتى مقررة تقفلى كل الأبواب المواربه للآذى و للتعلق المرضى اللى جواكى …
يلا بينا نشوف هنتعالج إزاى
أهم و أول خطوة للتعافى من أى علاقة مؤذية هى
• الإعتراف بيها من غير أى تزيين للألم و خداع للعقل ( آه أنا اتآذيت ) ( أنا إتوجعت ) .
• إحذفى الشخص المؤذي من حياتك للأبد بدون رجعة و يوم ما قلبك يحن ليه … إفتكرى الوجع و الدمار اللى خلقة جواكى بأنانيته .
• إياكى ثم إياكى تدخلى ف قصة حب جديدة و إنتى لسه جواكى أى بقايا من الحب القديم .
• حاولى تكون صاحبه قرار و ليكى رأى علشان متسمحيش لأى شخص يكون هو المتحكم فيكى و فى مشاعرك .
• إقرأى كتير عن كل الشخصيات لأنك وقتها هتكونى عرفتى معالم أغلب الشخصيات اللى بتتعاملى معاها و هيكون مش سهل أبداً خداعك مرة تانيه تحت مسمى الحب .
أتمنى قارئتى الجميله و وردتى الرقيقة أنى أكون قدرت أوصلك و أساعدك فى رحله التعافى من أى علاقة مؤذيه مريتى بيها .