متلازمة إرضاء الآخرين

متلازمة إرضاء الآخرين
بقلم / هاميس جمال .
و الحكايه هنا عن جحا و إبنه و الحمار .
طبعا قصة كلنا عارفينها و حافظينها .
لما جحا كان قاعد ع الحمار و إبنه ماشي ع الأرض ، كل الناس استغربت و استنكرت موقف جحا و وصفوا قلبه بالقسوة لأنه راكب الحمار و إبنه ماشي ع الأرض ، ف نزل جحا و ركب ابنه الحمار ، بردو الناس اترقيت ، ف نزل ابنه و مشيوا ، معجبش الناس ،،، قوم شال جحا و إبنه الحمار … و كل دة علشان يرضى الناس ….
وهى دة عنوان مقال النهاردة
{ متلازمة إرضاء الآخرين }
طيب هو ايه اللى يجبرنى ع إرضاء جميع الناس و ليه أصلا ؟؟
قبل ما اتكلم عن أصحاب المتلازمة دى احب الاول اقولكم أنهم أشخاص حقيقى طيبين و جواهم محبه لكل المحيطين بيهم .
أشخاص ف طبيعتهم هادين و على درجة جامدة جدا من التضحية لأجل الآخرين .
و يمكن اول شخصية ممكن تكون كدة نوعاً ما هى الأم لقدرتها الغير عاديه ع التضحية سواء ب وقت أو مجهود بدنى او حتى نفسى .
و الأكيد أننا قابلنا ف حياتنا على الأقل شخصية واحدة من مصابين ب ( متلازمة إرضاء الآخرين)
يلا نبدأ بإسبابها :-
• للأسف صاحب المتلازمة دى بيكون فاقد للأحتواء و المحبه من طفولته ، لأنه تربى ع العنف و الشدة .
• فاقد للكلمة الحلوة و الإهتمام سواء من الأب أو الأم .
• بيعانى ف الأساس من إنعدام الثقة الرهيب بالنفس ( الإحساس بالدونيه ) و دة السبب أنه منعدم الشخصية و الرأى كمان .
حاجة كدة تقدر توصفها بأنه زى القشه وسط البحر موجة توديه و موجة تجيبه !!
_ لكن هو ف قرار نفسة زى ما قلت ف البدايه إنسان طيب جدا و حساس و يبحث عن الحب بإستعطاف مشاعر الآخرين بالرضا عنه .
• هتلاقيه كمان شاغل نفسة جداً بإهتمامات الآخرين على حساب إهتمامته هو .
• شخصيتة للأسف مهزوزة جداً ف الدفاع عن حقوقه خوفاً من ابتعاد الناس عنه ، و دة طبعا بيعرضة للاهانه من البعض .
• ممكن يوصف ب( جبان ) و دة لأنه دائما متنازل عن حقوقه ، خوفاً من الدفاع عنها .
• صعب جدا تلاقى جسده أو فكره مرتاح ، والسبب أنه دائما شاغل نفسه بالغير و بينفذ كل أوامر الآخرين .
• دايما تفكيره ف وضع حيره شديدة ما بين تنفيذ أوامر الآخرين لكسب حبهم و احترامهم و ما بين رفضة لأغلب الأوامر دى .
• جواه شعور رهيب بالوحدة علشان كدة بيشحت مشاعر الحب من الآخرين .
تعالوا بقى نتكلم امتى و ازاى نقول ( لأ )
١- قرر أولاً و قبل أى حاجة إنك تحب نفسك حب حقيقى .
٢- أتعلم تقول ( لأ ) لأى أمر إنت مش مرتاح لتنفيذه و هتيعبك ( سواء نفسياً أو جسدياً ) .
٣- خليك شخصية حازمة لو لاحظت بأى إنتهاك لحدودك الشخصية .
٤- رتب امورك و حياتك بالطريقة اللى تعجبك أنت و بس مش تعجب الغير .
٥- عبر عن نفسك و أرآئك بكل وضوح و من غير خوف أو كسوف .
يا عزيزى القارئ لو كنت من الشخصية المصابه ب ( متلازمة إرضاء الآخرين ) ف متزعلش و إفرح بطيبه قلبك و حبك الغير مشروط للأخرين ، و لكن حافظ على حدودك من إنتهاز و إنتهاكهم ليك .
دمتم بخير و كامل الصحة النفسية و الجسدية .