أعرب الفنان إياد نصار عن سعادته الكبيرة بنجاح مسلسله مفترق طرق، الذي تعاون خلاله مع الفنانة هند صبري، وعُرض مؤخرًا عبر منصة شاهد.
وقال إياد نصار، في لقائه مع برنامج ET بالعربي: مبسوط بردود الفعل ومبسوط إن المسلسل عاجب ناس كتير واللي لفت انتباهي أكتر إنه عاجب فئات عمرية مختلفة والشباب بيتابعوه وهما في العادي مبيتابعوش حاجة، ومراتي حابة المسلسل جدًا وبتابعه.
وعن انطباعه حول شخصيته في مسلسل مفترق طرق، أضاف إياد نصار: مكنش عندي مشكلة في فكرة إن الشخصية بتحب بقالها 15 سنة، المفروض الإنسان لما يحب يحب بجد حتى لو الإنسانة دي مبقتش معاه وفي حياته، وشايف إن شخصية يحيى حاولت وصبرت وكان عنده أمل وخلص، فاتحرك في اتجاه اليأس، وكان مشهد اعترافه بحبه بعد 15 سنة مهم بالنسبالي.
وأكمل: أنا متعاطف مع شخصية دارين اللي بتقدمها جومانا مراد، لكن مش متعاطف مع سلوكها، صعب يكون إنسان بيحمل لك مشاعر حب وأنت تقابله بالصد والرفض.
أما عن مشهد ضربه لـ علي الطيب خلال أحداث العمل، فعلق إياد نصار قائلا: أكيد مضربتش علي الطيب، ده حتى اسمه علي الطيب، وهو حبيبي وعامل الدور حلو جدًا، والقرار كان للمخرج إننا مش عايزينه مشهد أكشن وضرب، لكنه بيخرج شوية من شحنات الغضب اللي موجودة عند الناس.